هكذا كانت ثورتي 1

السبت، 12 مارس 2011

احبابي و اخواني 
حياكم الله 

عندي حالة غير عادية من الرغبه في التدوين اليومي 
بس بكسل :)
فقررت اني اكتب كل يوم 
عن ايام الثورة بالنسبه لي
خاصةً
اني كل يوم بسمع فيديوهات و مقتطفات من احداث و تفاصيل الثورة و مازالت اتأثر بها

و افتكرت يوم جمعة الغضب و انا شايف مدينتي خارجة عن بِكرة ابيها و انا اكاد احلم كل هؤلاء البشر اللهم لك الحمد :)


كنت خارج و في بالي اخويه اللي في الغربة 
و  اولاد اخوتي اللي نفسي يعيشوا حياة افضل مننا 


و انا الصراحة افتخر بامي رغم خوفها الشديد عليه مكنتش بتمانع من اني انزل المظاهرات الامر كان منتهي بالنسبه لهاو كمان كانت تقول لمن يقول لها ( بلاش تنزلي ولادك الشارع )
كانت تقول : اومال مين اللي حيجيب لنا حقنا ؟
علي الرغم انها كانت خايفة بطريقة غير عادية 
..........................................................
يوم الجمعة 28 يناير 
جمعة الغضب 

و خرجنا من ثلاث مسجد التوبة و الاتوبيس و السوسي 
انا كنت في مسجد التوبة 
وقفنا في انتظار انضمام باقي المظاهرات الينا 
و هناك ممثلين عن الاحزاب و الاخوان المسلمين و 6 ابريل 
يتحدثوا الي الشعب الغاضب لتوعية بالمطالب 
و للاسف الناس كانت نازله تطلع كبتها في  الامن المركزي اللي كان علي بعض امتار مننا :)
الا قليل 

بدأنا بالحركة و الامن كذلك و اطلقت الغازات المسيلة للدموع و الواحد كان مستعد لها طبعاً :) خبره بردو 

و لكن المفاجأة ان الامن بقي بين كمشتين مننا ناس من التوبة و ناس من السوسي و كانت عددهم قليل ممكن تقول خمس عدد الحشود مثلا او اقل
اخدوا نفسهم لما انضربوا و اخدنا منهم الشوم بتاعهم  دخلوا العربيات تاني و الامن بيقول لنا اتفضلوا تظاهروا براحتكم  
:)
 طبعا الشعب تعاطف مع الامن المركزي و في ناس قبلت مسئول الامن المركزي لانه سمح لنا بالمرور

تحركنا الي مبني المحافظة و قلنا سنعتصم عنده
بعد ساعة وجدنا الامن تحرك الينا قلنا لن نشتبك معهم و نذهب الي ميدان الاوبرا الذي يتواجد به قسم الشرطة و مبني الحزب الوطني و امن الدولة ( متحف الظالمين الان )

في هذه الاوقات شعرت ان الجو هاديء فذهبت الي البيت للغداء ثم اعود مرة اخري و البيت مش بعيد عن الميدان فقط 3 دقائق 

يلا انا نازل تاني اكلم احد اصدقائي ايوة يا فوده انت فين ؟
ايوه يا عاشور .. الحزب الوثني التولع فيه 
الناس اتجننت يا عم
مين يعني اللي ولع فيه ما الجو كان هادي !!
مش عارفين يا عاشور عيال شكلها غلط

انا صعقت و سمعت صوت اطلاق للغازات المسيلة للدموع فذهبت للصيدلية لاحضار كمامات 
فقط تحركت مع صديقي الاخر زين الدين ووجدنا الناس بتجري و قادمين الينا !!!
مش فاهمين حاجة !!
و شوية و لقيت الناس بيضربوا في امن الدولة و بيولعوا فيها و دخان كثيف و جراج السيارات ولع كاملا 
انا اتحركت عشان اصور فعلا بدأت في التصوير
و انا حزين علي ما يحدث ليه كل دا ايه اللي حصل ؟!

و انا بصور لقيت الباب الخلفي لامن الدولة فتح و خارج ناس منه و معاهم رشاشات انا قلت بس و يا فكيك  :)

جريت طبعا و دخلت الناس البيوت بتاعت شارعنا لما شفته بيعمرها و ممكن يضرب 
بس انا مش فاهم بردوا ليه حصل كل دا ؟؟

لحد ما وصلني الفيديو دا 


كان استشهاد الشاب دا سبب انفجار الثورة في دمنهور 
الامن وصل لحد البيت عندي و مازال بيضرب قنابل مسيلة للدموع اللي دخلت بيوت المنطقة كلها 

اليوم دا انا بكيت بحرية و غصب عني كمان :)  لما طلعت علي السطح اشوف الحريق اللي في امن الدولة 
و بعد شوية ظهر البلطجية مع الامن مع الشرطة ايد واحدة بيحموا امن الدولة 
بعد حريق امن الدولة و البندر و مقر الحزب الواطي

و كان اول يوم ثورة حقيقي في دمنهور 

يتبع .. غدا 
و يوم السبت 29 يناير 

يوم جاااامد
يوم التحرير

7 مش كفايه انك تعلق المهم انك تتابعنا ::

شمس النهار يقول...

نفسي كل البلوجر يكتبوا عن اللحظات الجميلة اللي عاشوها في الثورة

عارف انا ندمت اني ماكتبتش يةمياتي ايام حرب 73 وايام مظاهرات الجامعة ضد كامب ديفد

دون كل اللي حصل قبل ماتكبر وتنسي

غير معرف يقول...

good :)

شهر زاد يقول...

السلام عليكم
والله احلى ما قمت به هو انك دونت والله حستنى باقي الاجزاء
تحياتي

مدونه ما كفايه بقى يقول...

ذكرتنى بمشاعرنا أيام الثوره

منتظره يوم التحرير

تحياتى

sony2000 يقول...

بجد بتفكرني بأيام مش هننساها:)
شوف اللي انا حطيتوا
وبفكر اعمل زيك
بس مش دلوقتي
ربنا يسهل

iBrahim aAdam يقول...

ذكريااااااااااات
عقبال ما تكمل على خير إن شاء الله

;كارولين فاروق يقول...

جميل انك تكتب
عن ذكريات مع الثوره
دومت بخير