لم ننسي دم شهيد

الجمعة، 8 أبريل 2011


حدث في مثل هذا اليوم 
الثامن من ابريل 
1970 م


قومي يا فاطمة عشان مدرستك

و انت كمان قوم يا حسين

قوم يا حبيبي إنت وأختك

أيوه يا أمي خلاص قايمين

قوم يا حبيبي الشمس أهي طلعت

طالعة تبوس خد الشاطرين

صباح الخير عليكي يا أمي

صباح الفل على الطعمين

تعالي يا فاطمة أعملك شعرك

الله يصون ست الحلوين

ياللا يا شطار آدي الإفطار

تسلم إيد ست الغاليين

آدي شنطكم وآدي كتبكم

يحميكوا ربي من الحاسدين

( من جد وجد )..

( من زرع حصد ) ..

ومرت ساعة أو ساعتين

وفجأة ..!!

قنابل زي السيل

نازلة ياعيني على المساكين

وصراخ يعلى ...

وصوت بيهدي ..:

أمي ...

أبويا ....

وراحوا ساكتين ..

وصوت بينادي :

-فين أولادي ..؟

.. راحوا مني في غمضة عين ..؟ والتانية بتصرخ :

ابني وحيدي ..

لغيرك يا بني أنا عايشة لمين ..؟

والتالتة بتجري وتصرخ برضه :

-ابني

-حبيبي ... -ضنايا فين ..؟

آدي مسطرته ..

وآدي كراسته ..

مكتوب فيها يادوب سطرين

سطرين بس انكتبوا بدمه

يحكوا ندالة الخاينين

و آدي كراسة ( فاطمة المصري )..

.. وآدي كتاب أخوها ( حسين ) ..!!

.. و آدي شريط الشعر بتاعها

وكمان شنطة ( ليلى أمين )

سجل يا تاريخ واكتب عندك

طيران ..

وقنابل ..

وكراستين ..!!!

وأزهار بيضا بتنزف دم

مين ضمايرهم تصرخ ..؟

مين …؟

وكمان يا تاريخ وقَّف لحظة

خلينا نبوس ( فاطمة )
و ( حسين )










9 مش كفايه انك تعلق المهم انك تتابعنا ::

Elsayed Azab يقول...

شكرا بجد يامحمود انك فكرت الناس باليوم دة اللى مينفعش يتنسى من ذاكرتنا ابدا ..

ربنا يرحم كل شهدائنا يارب ..

تحياتى

Mahmoud Ahmed يقول...

اكيد مش هننسا
ربنا يرحم كل الشهداء يارب ان شاء الله
و الناس مضيعش حقهم ابدا

مدونة مفيـد يقول...

ما أقسى هذه الحياة !!

لكن لا يجب أن ننسى بأن أشد اللحظات ظلمة هي اللحظة التي يليها ضوء الفجر

و نحن قي ارتقاب هذا الضوء


سلامي

ليلى الصباحى.. lolocat يقول...

السلام عليكم
طبعا مش ممكن ننسى يوم زى ده خاصة ان اغلب عائلتى بالحسنية بالشرقية
انا كنت الان بمدونة عصفور الجنة للاساذ فاروق وكاتب شعر جميل لليوم ده

زرت وانا صغيرة مكان المدرسة وكان ساعتها مزار تاريخى وبعض الانشاءات البسيطة فيه ورايت بعض الاشياء للاطفال وكان شىء مؤلم جدا مش اعرف الان المكان اصبح ايه .... لكن فعلا مافى انسان فى الشرقية خاصة وفى مصر بوجه عام ممكن ينسى الجريمة دى .... والسبب الرئيسى ان الصهاينة لازالوا يكرروا الجريمة مع اخواننا وابناءنا بفلسطين


اشكرك محمود على التذكرة والكلمات الصادقة

تحياتى وتقديرى لك

دعاء العطار يقول...

ياه عيشتنا فيه كانه حاصل النهارده

وفعلاً هو بيحصل كللللللللل يوم بس مع اختلاف الشهداء

واعتقد اننا كلنا دمنا واحد ... سواء مصريين او فلسطينين

الموضوع ده ينقصه قصيدة عمنا جاهين " الدرس انتهى "

بجد شكرا ليك ع الموضوع ده

وربنا يرحم كللللللل شهدائنا يارب

مسلمة حرة يقول...

إبنى العزيز
بارك الله فيك
دم الشهداء لن يضيع أبدا بإذن الله
رغم الدماء التى لا زالت تسفك حتى اليوم على يد هؤلاء المجرمين فى فلسطين
لن تضيع هذه الدماء أبدا إن شاء الله
ولابد من يوم تترد فيه المظالم
وسيدفع هؤلاء المجرمين ثمن جرائمهم
عشان كده لازم نفضل فاكرين وما ننساش أبدا
بارك الله فيك

sony2000 يقول...

مهما مرت الايام
هنجيب حقهم بأذن الله

Unknown يقول...

شكراً على التذكرة..
فالذكرى تنفع المؤمنين

كلمات من نور يقول...

لم ولن ننسى دماء روت الكثير والكثير من القصص والبطولات على أرض مصرنا

جزاك الله خيرا يا مصوراتي